更換水龍頭

Wow, 又一突破，自己換水龍頭

話說尋晚搭完飛機返到香港，第一時間拎曬行李喼d衫出黎洗，執好d野後，想沖埋涼一機過洗曬d衫，但唔知係咪去完旅行太興奮，開完個水龍頭之後點關都關唔到，感覺到裏面有d野斷左/鬆左/甩左咁，唯有沖完涼即刻放個花灑落水桶度，即刻拿拿淋去關水制。。。我地既情況唔係漏水，係正常出水，只係開大左水之後關唔番細，不斷長開住。

Google左幾個網睇，話換水龍頭，就咁拎士巴拿擰就得，今日打電話去2年前幫我地裝修既師傅太太問，佢話9成9係個沖涼水龍頭位，*保險制*壞左斷左，自己去賣水龍頭d舖(五金舖)買番個*打橫*既，換番佢就得。條喉同花灑無事，唔係牆位有事，係水龍頭位要成個換啫。唔識換再揾佢地啦。

所以就同媽媽去左附近五金舖睇下，睇左2間，意大利(佢話啦)winkler牌，$720，平既2xx都有，但大陸貨唔好啦，意大利好些吧(師傅話佢話係[意大利]啦)。店員以為我地買俾裝修師傅整，我地話唔係呀自己整，佢見我地兩母女，就教多幾句點整啦。。。

牆身兩個銀圈唔洗郁佢，擰左水龍頭出黎換就得啦。佢俾多2個黑膠圈仔我地，媽媽話佢叫*水喉皮*(好攪笑啦呢d名)，放係水龍頭擰個位入面擰番入牆身。拎毛巾包住擰就唔會花。一定要2邊1齊擰，每邊一齊擰少少、擰少少咁上。

番到去我地2話不說拿拿淋拎士巴拿出黎，3兩下就擰左舊水龍頭出黎(我地本身已關左水制，唔係就不斷漏水)。Wow, 本身覺得好勁呀！結果之後都攪左個幾鐘，我地第一次整丫嗎!係咁啦。。。

本身唔理解點解要用毛巾，點解要用黑膠圈(水喉皮)。牆身個2個上既位，原來一個長d, 一個短d, 佢咁設計係方便可以一邊上完少少固定好，再2邊一齊上，但我地起初唔太掌握到，所以攪到上左第四次先整好。

諗住佢一長一短，係咪個圈用一邊就得呢，原來唔用一開水制一定會漏水，因為鐵牙間點上都有空隙，所以2邊都一定要用一個。上水龍頭一定要2邊一齊上，唔係*咩*左(*歪*左)就唔得。我地本身無用毛巾包住擰，個金屬位會俾個拑整花左，所以之後我地都用番條薄既毛巾包住擰，因為太厚我地控制唔到個拑。雖然佢都已經花左lu, 但我地都覺得算係咁啦，自己han番150蚊係咁。試左幾次，開水制關水制，佢終於好地地無漏水啦，好野!

總結
上水龍頭一定要用膠圈先會頂住唔漏水
用薄毛巾包住先擰就唔會花
個位一長一短就要係長個邊上好到一樣長度之後，再一齊擰入去，一定要兩邊平上
拆水龍頭前記得關水制
買牆身水龍頭有分打橫打直，留意仲有洗手盆同花灑之分
現時花灑水龍頭(不包喉，不包花灑，好少少質素)，在街舖買$4xx - $8xx 左右，我們問那間生寶客收$150人工費(咁我諗我呢篇tips都值$50 lu 嘻嘻)

又學多樣新野~! (^_^)/~~